གསོ་སྦྱོང་ལས“སྟོང་སྡེ་དཔེ་སྟོན་དང་ཁྲི་སྡེ་སྒྲིག་བཅོས”བཟོ་སྐྲུན་གྱི་ཉམས་མྱོང་སློབ་སྦྱོང་དང་བཀོལ་སྤྱོད་བྱ་རྒྱུ་སྣེ་ཁྲིད་དུ་བྱེད་པ་དང་། ཞིང་ལས་ཞིང་སྡེ་སྤུས་ཚད་མཐོ་བའི་ངང་འཕེལ་རྒྱས་སུ་གཏོང་བའི་ཐད་ཀྱི་འཇོན་མིའི་དགོས་མཁོ་ལ་ཁ་ཕྱོགས་ནས། ལག་རྩལ་རྩལ་ནུས་ཆུ་ཚད་མཐོར་འདེགས་སུ་གཏོང་བ་དང་ཐོན་ལས་འཕེལ་རྒྱས་ཀྱི་ནུས་པ་མཐོར་འདེགས་སུ་གཏོང་བ། ཕྱོགས་བསྡུས་བྱང་ཚད་མཐོར་འདེགས་སུ་གཏོང་བར་གཙིགས་སུ་བཟུང་བ་དང་། འབྲུ་རིགས་བདེ་འཇགས་ཀྱི་སྲུང་སྐྱོབ་པ་དང་ཐོན་ལས་འཕེལ་རྒྱས་ཀྱི་སྣེ་ཁྲིད་པ། གྲོང་གསེབ་དར་སྤེལ་གྱི་གཙོ་ཤུགས་སྐྱེད་སྲིང་བྱས་ལ། སྦྱོང་སྤྱོད་འབྲེལ་མཐུད་ཀྱི་ཕྱོགས་བསྡུས་ཚོད་ལྟ་བྱ་བ་སྤེལ་ནས། རང་ཞིང་གི་གྲོང་གསེབ་དར་སྤེལ་དང་ཞིང་ལས་ཞིང་སྡེ་དེང་རབས་ཅན་ལ་ཁྱོན་ཡོངས་ནས་སྐུལ་འདེད་གཏོང་བའི་ཐད་འཇོན་མིའི་འགན་སྲུང་བརྟན་པོ་འདོན་སྤྲོད་བྱ་རྒྱུ་རེད།

གསོ་སྦྱོང་གི་སྤུས་ཚད་དང་གྲུབ་འབྲས་མཐོར་འདེགས་སུ་གཏོང་བར་ཁག་ཐེག་བྱ་ཆེད། ས་ཆ་སོ་སོའི་ཞིང་ལས་ཞིང་སྡེ་སྡེ་ཁག་གིས་འཛིན་གྲྭ་རེ་རེའི་སློབ་མ50%ལ་རྗེས་འདེད་ཞབས་ཞུ་ཐེངས་གཉིས་ལས་མི་ཉུང་བ་སྤེལ་རྒྱུ་ཡིན་པ་དང་། གསོ་སྦྱོང་སློབ་ཁྲིད་བཀོད་སྒྲིག་ཁྲོད། ཆེད་ལས་རྩལ་ནུས་ཀྱི་སློབ་ཁྲིད་དུས་ཚོད་དེ་སྤྱིའི་སློབ་ཁྲིད་དུས་ཚོད་ཀྱི60%ལས་མི་ཉུང་བ་དང་། འབྲུ་སྣུམ་ཐོན་ཚད་མཐོར་འདེགས་སུ་གཏོང་བ་སོགས་ཀྱི་ཐོན་སྐྱེད་ལག་རྩལ་གསོ་སྦྱོང་གཙོར་བྱས་ནས། གསོ་སྦྱོང་དུས་ཚོད་ཀྱི་གྲངས་ཀ་དེ་སྤྱིའི་སློབ་ཁྲིད་དུས་ཚོད་ཀྱི་སུམ་ཆའི་གཉིས་ལ་མི་ཉུང་བར་བྱས་ཡོད། གསོ་སྦྱོང་གིས་ད་དུང་རོང་འབྲོག་པའི་བསམ་བློ་ཆབ་སྲིད་སློབ་གསོ་ལ་ཤུགས་སྣོན་པ་དང་། ཕྱོགས་བསྡུས་བྱང་ཚད་དང་ཆེད་ལས་རྩལ་ནུས་སློབ་ཁྲིད། ནུས་པ་རྒྱ་སྐྱེད་སློབ་ཁྲིད་བཀོད་སྒྲིག་བྱེད་པ། སྲིད་འཛིན་གཙོ་འགན་སྡེ་ཁག་གི་སློབ་ཁྲིད་དང་པོ་ལག་བསྟར་ནན་མོ་བྱེད་པ་དང་། གོ་བདེ་བའི་སྐད་ཆ་བཀོལ་ནས་གསོ་སྦྱོང་ལ་ཞུགས་པའི་རོང་འབྲོག་མང་ཚོགས་ལ་སྒྲོག་འགྲེལ་བྱེད་པའི་དུས་མཚུངས་སུ། གྲངས་ཉུང་མི་རིགས་ས་ཁུལ་གྱི་སྐད་གཉིས་སློབ་ཁྲིད་དམ་འཛིན་བྱེད་པ་དང་། ཞིང་སྡེའི་འཇོན་མི་དང་གྲོང་གསེབ་ཀྱི་བཟོ་སྐྲུན་པ། རོང་འབྲོག་ཁུལ་གྱི་ཕྱུག་བསྒྱུར་མི་སྣ་སོགས་ཞིང་སྡེའི་འཇོན་མིའི་སྔོག་འདོན་སྐྱེད་སྲིང་བྱེད་པར་ཤུགས་སྣོན་རྒྱུ་རེད།

རྒྱུས་ལོན་པ་ལྟར་ན། ད་ལོར་སྤུས་ཚད་མཐོ་བའི་རོང་འབྲོག་པ་མང་ཚོགས5115ལ་གསོ་སྦྱོང་བྱ་རྒྱུ་ཡིན་པ་དང་། སྦྱོང་སྤྱོད་འབྲེལ་མཐུད་ཚོད་ལྟ་བྱེད་ས་དེ་རྟ་ཐང་ཧུའེ་རིགས་ཧོར་རིགས་རང་སྐྱོང་རྫོང་དང་ཕིན་ཨན་ཆུས། ཧུའུ་ཀྲུའུ་ཧོར་རིགས་རང་སྐྱོང་རྫོང་། ཁྲི་ཀ་རྫོང་བཅས་རྫོང་དང་ཆུས་བཞི་རུ་ལག་བསྟར་བྱ་རྒྱུ་ཡིན་ལ། འཆར་གཞི་ལྟར་མི200གསོ་སྦྱོང་བྱ་རྒྱུ་རེད། །