ཟླ5པའི་ཚེས22ཉིན་གྱི་སྔ་དྲོར། མཚོ་སྔོན་ཞིང་ཆེན་ཏང་ཨུའི་གཞུང་ལུགས་སློབ་སྦྱོང་ལྟེ་གནས་ཚན་ཆུང་གིས་རྒྱ་སྐྱེད་སློབ་སྦྱོང་ཚོགས་འདུ་བསྡུས་ཤིང་། རྒྱལ་ཡོངས་སྲིད་གྲོས་ཀྱི་དྲུང་ཡིག་ཆེན་མོ་གཞོན་པའམ་ལས་ཁུངས་ཏང་རྩ་འཛུགས་ཀྱི་ཁོངས་མི་ཧུའུ་ཧེང་ལུའུ་གདན་དྲངས་ནས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མི་དམངས་སྲིད་གྲོས་ལས་དོན་ལ་ཤུགས་སྣོན་དང་ལེགས་བཅོས་གཏོང་བའི་སྐོར་བའི་དགོངས་པ་གལ་ཆེན་སློབ་སྦྱོང་ལག་བསྟར་ཟབ་མོ་བྱེད་པར་དམིགས་ཏེ་ཆེད་དོན་ཟུར་ཁྲིད་སྙན་ཞུ་ཕུལ། ཞིང་ཆེན་ཏང་ཨུའི་ཧྲུའུ་ཅིའམ་ཞིང་ཆེན་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རེན་ཝུའུ་ཞའོ་ཅུན་གྱིས་མགོ་འཛིན་མཛད། མགོན་པོ་བཀྲ་ཤིས་ཚོགས་འདུར་ཞུགས།

ཧུའུ་ཧེང་ལུའུ་ཡིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀྲུང་གོ་མི་དམངས་ཆབ་སྲིད་གྲོས་མོལ་ཚོགས་འདུ་བཙུགས་ནས་ལོ་འཁོར75ལོན་པར་རྟེན་འབྲེལ་ཞུ་བའི་ཚོགས་ཆེན་ཐོག་གི་གསུང་བཤད་གལ་ཆེན་གྱི་དགོངས་དོན་སློབ་སྦྱོང་ལག་བསྟར་བྱེད་པར་དམ་པར་དམིགས་པ་དང་། གཞུང་ལུགས་ཞིབ་འཇུག་དང་ལས་དོན་ལག་ལེན་ལ་ཟུང་འབྲེལ་གྱིས་རྒྱུད་ཁོངས་ལྡན་པའི་ཟུར་ཁྲིད་བྱས་པ་ནི། དབང་གྲགས་ལྡན་པ་དང་གསོན་ཉམས་ལྡན་པའི་ཆབ་སྲིད་གཞུང་ལུགས་ཀྱི་སློབ་ཁྲིད་ཅིག་དང་ལག་ལེན་མཛུབ་སྟོན་གྱི་སློབ་ཁྲིད་ཅིག་རེད།

ཝུའུ་ཞའོ་ཅུན་གྱིས་མགོ་འཛིན་གསུང་བཤད་ལས་བསྟན་དོན། ད་ལོ་ནི་མཚོ་སྔོན་ཞིང་ཆེན་སྲིད་གྲོས་བཙུགས་ནས་ལོ་འཁོར70ལོན་པ་ཡིན་པས། ཞིང་ཆེན་ཡོངས་ཀྱི་རིམ་པ་སོ་སོའི་སྲིད་གྲོས་ཀྱིས་བློ་མཐུན་ཞི་ཅིན་ཕིང་སྲོག་ཤིང་ཡིན་པའི་ཀྲུང་གུང་ཀྲུང་དབྱང་གི་མཐའ་འཁོར་དུ་དམ་པོར་དམིགས་པ་དང་། ཆབ་སྲིད་འགན་འཁྲི་ཡིད་ལ་དམ་པོར་འཛིན་པ། བསམ་བློའི་ཆབ་སྲིད་སྣེ་ཁྲིད་ཇེ་དྲག་ཏུ་གཏོང་བ། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོར་སྐྱེད་པ་དེ་སྲིད་གྲོས་ལས་དོན་གྱི་གཙོ་སྐུད་དུ་འཛིན་པ། སྲིད་གྲོས་རྩ་འཛུགས་དང་སྲིད་གྲོས་ཨུ་ཡོན་གྱི་སྦྲེལ་ཟམ་ལྟ་བུའི་ནུས་པ་ཕུན་སུམ་ཚོགས་པར་འདོན་པ། ཏང་ཤོག་ཚོགས་པ་སོ་སོ་དང་མི་རིགས་སོ་སོ། ལས་རིགས་པའི་སྡེ་ཡི་མི་སྣ་སོ་སོ་བཅས་ཀྱི་མཐུན་སྒྲིལ་མཉམ་ལས་དང་བསམ་བློ་ཡར་ཐོན། འགུལ་སྐྱོད་གཅིག་གྱུར་བཅས་ལ་སྐུལ་འདེད་གཏོང་བ། མི་རིགས་སོ་སོའི་མང་ཚོགས་འགྲོ་འོང་བརྗེ་རེས་མཉམ་འདྲེས་སྔར་ལས་ལྷག་པར་ཆེར་བསྐྱེད་དེ། མི་སེམས་གཅིག་ཏུ་སྔར་བས་དམ་པོར་སྡོམ་པ་དང་ཐུན་མོང་ངོས་ཟིན་སྔར་ལས་བརྟན་པོར་སྐྱེད་པ་བཅས་བྱེད་དགོས། ཆབ་སྲིད་ཀྱི་ཁག་ཁུར་ཕྲག་ཏུ་ལེན་པ་དང་། “སྐྱེ་ཁམས་དཔལ་ཡོན་གྱི་མཐོ་ས་སྐྲུན་པ་དང་ཐོན་ལས་ཀྱི‘གནས་བཞི’འཛུགས་སྐྲུན”གྱི་འཐབ་ཇུས་ལས་འགན་གལ་ཆེན་དང་། དེང་རབས་ཅན་གྱི་མཚོ་སྔོན་གསར་པ་འཛུགས་སྐྲུན་གྱི་སྤྱིའི་དམིགས་འབེན་བཅས་ལ་དམ་པོར་སྦྲེལ་བ། མི་དམངས་སྲིད་གྲོས་ཀྱི་རང་སྟེང་དགེ་མཚན་ཕུན་སུམ་ཚོགས་པར་འདོན་པ། སྲིད་གྲོས་ཨུ་ཡོན་གཞི་རིམ་དང་ཁེ་ལས། ལས་གཞི་བཅས་ལ་ཟབ་འཇུག་སྒོས་ཡུལ་དངོས་དང་པོ་ནས་བརྟག་དཔྱད་ཞིབ་འཇུག་དང་གྲོས་མོལ། སྲིད་གླེང་བཅས་ཀྱི་བྱེད་སྒོ་སྤེལ་བར་རྩ་འཛུགས་ལེགས་པོ་བྱས་ཏེ། མཚོ་སྔོན་གྱི་སྤུས་ཚད་མཐོ་བའི་འཕེལ་རྒྱས་མངོན་འགྱུར་ལ་སྐུལ་འདེད་གཏོང་བར་མི་དམངས་སྲིད་གྲོས་ཀྱི་སྟོབས་ཤུགས་སྐྱེས་སུ་འབུལ་དགོས། དམངས་དོན་འགན་འཁྲི་ལག་ལེན་དུ་འདེབས་པ་དང་། སྲིད་གྲོས་ཨུ་ཡོན་གྱི་སྲིད་གྲོས་ལས་དོན་ཁྲོད་ཀྱི་གཙོ་གཞིའི་ནུས་པ་དང་རིགས་དབྱེ་མང་ཚོགས་ཁྲོད་ཀྱི་འཐུས་མིའི་ནུས་པ་ལེགས་པར་འདོན་པ། མི་རིགས་སོ་སོའི་མང་ཚོགས་ཀྱི་མཛེས་སྡུག་ལྡན་པའི་འཚོ་བའི་སྣ་མང་དགོས་མཁོ་དང་གནད་འཁེལ་མཐུད་སྦྲེལ་བྱེད་པ། དམངས་འཚོ་ཁྱབ་ཁོངས་ལ་དམིགས་ནས་གནད་དོན་གལ་ཆེན་ལ་ཐབས་ལམ་དངོས་འདོན་པ་དང་གྲོས་གཞི་ལེགས་པོ་འདོན་པ། དམངས་དོན་དུ་གྲོས་མོལ་དང་དམངས་དོན་དུ་གྲོས་འདོན། དམངས་དོན་དུ་ལྟ་སྐུལ། དམངས་དོན་དུ་འགན་སྒྲུབ་བཅས་ངེས་པ་དོན་གྱིས་སྒྲུབ་ཐུབ་པར་བྱས་ཏེ། མི་རིགས་སོ་སོའི་མང་ཚོགས་ཀྱི་ཐོབ་སྣང་དང་སྐྱིད་སྣང་། བདེ་སྣང་བཅས་མུ་མཐུད་དུ་མཐོར་འདེགས་དགོས།

ཞིང་ཆེན་ཏང་ཨུའི་གཞུང་ལུགས་སློབ་སྦྱོང་ལྟེ་གནས་ཚན་ཆུང་གི་ཁོངས་མི་དང་། ཞིང་ཆེན་དམངས་ཆེན་རྒྱུན་ལས་ཨུ་ཡོན་ལྷན་ཁང་དང་ཞིང་ཆེན་སྲིད་གྲོས་ཀྱི་དྲུང་ཡིག་ཆེན་མོ། ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་གི་འབྲེལ་ཡོད་དྲུང་ཡིག་ཆེན་མོ་གཞོན་པ། ཞིང་ཆེན་ཏང་ཨུའི་པུའུ་ཨུ་སོ་སོ་དང་ཞིང་ཆེན་ཐད་གཏོགས་ལས་ཁུངས་སོ་སོ། མི་དམངས་ཚོགས་པ་སོ་སོ་དང་མང་ཚོགས་ཚོགས་པ་སོ་སོ། མཐོ་རིམ་སློབ་ཆེན་སོ་སོ། ཟི་ལིང་དུ་ཡོད་པའི་ཞིང་ཆེན་དོ་དམ་ཁེ་ལས་སོ་སོ། ཀྲུང་དབྱང་གི་མཚོ་སྔོན་དུ་བཅའ་སྡོད་བྱས་པའི་ལས་ཁུངས་ཀྱི་ཏང་ཙུའུ（ཏང་ཨུ）སོ་སོ་བཅས་ཀྱི་འགན་ཁུར་བློ་མཐུན་གཙོ་བོ། ཀྲུང་དབྱང་གི་མཚོ་སྔོན་དུ་བཅའ་སྡོད་བྱས་པའི་སྨྱན་སྦྱོར་གཙོ་བོའི་འགན་ཁུར་བློ་མཐུན། ཟི་ལིང་དུ་ཡོད་པའི་མཚོ་སྔོན་དུ་བཅའ་སྡོད་བྱས་པའི་རྒྱལ་ཡོངས་སྲིད་གྲོས་ཨུ་ཡོན་དང་ཞིང་ཆེན་སྲིད་གྲོས་ཀྱི་རྒྱུན་ཨུའི་འཐུས་མི། ཞིང་ཆེན་སྲིད་གྲོས་ཀྱི་ཆེད་དོན་ཨུ་ཡོན་ལྷན་ཁང་བཅས་ཀྱི་འགན་ཁུར་བློ་མཐུན་བཅས་ཚོགས་འདུར་ཞུགས། །