ཟླ9པའི་ཚེས5ཉིན།　རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས2025ལོའི་འཛམ་གླིང་རིག་ནུས་ཐོན་ལས་འགྲེམ་སྟོན་ཆེན་མོར་ལ་ཤིས་འཕྲིན་སྤྲིངས།

ཞི་ཅིན་ཕིང་གིས་བསྟན་དོན།　ད་ལྟ་མི་ཐབས་རིག་ནུས་ལག་རྩལ་མགྱོགས་མྱུར་ངང་འཕེལ་རྒྱས་བྱུང་ནས།　མིའི་རིགས་ཀྱི་ཐོན་སྐྱེད་དང་འཚོ་བ་རོལ་སྟངས་ལ་འགྱུར་ལྡོག་ཟབ་མོ་གཏོང་བཞིན་ཡོད་ལ།　འཛམ་གླིང་ཡོངས་ཀྱི་ཐོན་ལས་ཀྱི་གནས་བབ་བསྐྱར་དུ་སྐྲུན་བཞིན་ཡོད།　ཀྲུང་གོས་མི་ཐབས་རིག་ནུས་ཀྱི་འཕེལ་རྒྱས་དང་བཅོས་སྐྱོང་ལ་མཐོང་ཆེན་བྱས་ནས།　མི་ཐབས་རིག་ནུས་ཀྱི་ཚན་རྩལ་གསར་གཏོད་དང་ཐོན་ལས་གསར་གཏོད་མཉམ་འདྲེས་གཏིང་ཟབ་ཡོང་བར་འབད་པས་སྐུལ་འདེད་གཏོང་བ་དང་།　དཔལ་འབྱོར་སྤྱི་ཚོགས་སྤུས་ཚད་མཐོ་བའི་འཕེལ་རྒྱས་ལ་ནུས་པ་བསྩལ་ཏེ།　མི་དམངས་མང་ཚོགས་ཀྱི་འཚོ་བའི་སྤུས་ཚད་ཇེ་མཐོར་གཏོང་བར་རོགས་འདེགས་བྱས་ཡོད།

ཞི་ཅིན་ཕིང་གིས་ནན་གྱིས་བསྟན་དོན།　མི་ཐབས་རིག་ནུས་ནི་མིའི་རིགས་ལ་བདེ་སྐྱིད་སྐྲུན་པའི་རྒྱལ་སྤྱིའི་སྤྱི་བའི་ཐོན་རྫས་ཤིག་ཡིན།　ཀྲུང་གོས་འཛམ་གླིང་གི་རྒྱལ་ཁབ་སོ་སོ་དང་མི་ཐབས་རིག་ནུས་ཁྱབ་ཁོངས་ཀྱི་རྒྱལ་སྤྱིའི་མཉམ་ལས་རྒྱ་ཁྱབ་ཏུ་སྤེལ་འདོད་ཡོད་པ་དང་།　འཕེལ་རྒྱས་འཐབ་ཇུས་དང་བཅོས་སྐྱོང་སྒྲིག་སྲོལ།　ལག་རྩལ་ཚད་གཞི་སོགས་ཀྱི་འབྲེལ་མཐུད་མཐུན་སྦྱོར་ལ་ཤུགས་སྣོན་རྒྱུ་དང་།　རིག་ནུས་ཐོན་ལས་བདེ་ཐང་ངང་འཕེལ་རྒྱས་འབྱུང་བར་སྐུལ་འདེད་བཏང་སྟེ།　རིག་ནུས་གྲུབ་འབྲས་ཀྱིས་རྒྱལ་ཁབ་སོ་སོའི་མི་དམངས་ལ་སྔར་ལས་ཕན་བདེ་བསྐྲུན་འདོད་ཡོད།

2025ལོའི་འཛམ་གླིང་རིག་ནུས་ཐོན་ལས་འགྲེམ་སྟོན་ཆེན་མོ་ཉིན་དེར་ཁྲུང་ཆིང་གྲོང་ཁྱེར་དུ་མགོ་བརྩམས།　བརྗོད་དོན་ནི“མི་ཐབས་རིག་ནུས＋”དང“རིག་ནུས་སྦྲེལ་དྲའི་ནུས་ཁུངས་གསར་པའི་རླངས་འཁོར”ཞེས་པ་དེ་ཡིན་ལ།　ཁྲུང་ཆིང་གྲོང་ཁྱེར་མི་དམངས་སྲིད་གཞུང་དང་ཐེན་ཅིན་གྲོང་ཁྱེར་མི་དམངས་སྲིད་གཞུང་གིས་མཉམ་དུ་གཙོ་སྒྲུབ་བྱས་པ་ཡིན།　།