རྒྱལ་སྲིད་སྣ་བདུན།

འཁོར་ ལོས་ སྒྱུར་ བའི་ རྒྱལ་ པོ་ རིན་ པོ་ ཆེར། རྒྱས་ སྲིད་ རིན་ ཆེན་ སྣ་ བདུན་ ལྡན་ པའི་ ཚུལ། དོན་ རྣམས་ ཇི་ བཞིན་ གསལ་ བར་ མཁྱེན་ པའི་ ཆེད། ཚད་ ལྡན་ རྒྱལ་ བའི་ བཀའ་ ལས་ ཅུང་ ཟད་ དྲངས།

དེ་ ཡང་ རྒྱལ་ བའི་ བཀའ་ འགྱུར་ རིན་ པོ་ ཆེའི་ མདོ་ ཁ་ པའི་ ནང་ འཕགས་ པ་ རྒྱ་ ཆེར་ རོལ་ པ་ ཞེས་ བྱ་ བ་ ཐེག་ པ་ ཆེན་ པོའི་ མདོ་ ལས་ ཇི་ སྐད་ གསུངས་ པ་ འདི་ ལྟ་ སྟེ།

འཁོར་ ལོས་ སྒྱུར་ བའི་ རྒྱལ་ པོ་ མཐའ་ བཞིར་ རྣམ་ པར་ རྒྱལ་ བ། ཆོས་ དང་ ལྡན་ པ། ཆོས་ ཀྱི་ རྒྱལ་ པོ་ རིན་ པོ་ ཆེ་ སྣ་ བདུན་ དང་ ལྡན་ པར་ འགྱུར་ ཏེ། དེའི་ རིན་ པོ་ ཆེ་ སྣ་ བདུན་ ནི་ འདི་ འདི་ ལྟ་ སྟེ། འཁོར་ ལོ་ རིན་ པོ་ ཆེ་ དང་། གླང་ པོ་ རིན་ པོ་ ཆེ་ དང་། རྟ་མཆོག་ རིན་ པོ་ ཆེ་ དང་། བུད་ མེད་ རིན་ པོ་ ཆེ་ དང་། ནོར་ བུ་ རིན་ པོ་ ཆེ་ དང་། ཁྱིམ་ བཤད་ རིན་ པོ་ ཆེ་ དང་། བློན་ པོ་ རིན་ པོ་ ཆེ་ དང་ བདུན་ ནོ།

འཁོར་ ལོས་ སྒྱུར་ བའི་ རྒྱལ་ པོ་ འཁོར་ ལོ་ རིན་ པོ་ ཆེ་ རྣམ་ པ་ ཇི་ ལྟ་ བུ་ དང་ ལྡན་ པར་ འགྱུར་ ཞེ་ ན།

འདི་ ལ་ རྒྱལ་ པོ་ རྒྱལ་ རིགས་ སྤྱི་ བོ་ ནས་ དབང་ བསྐུར་ བའི་ གསོ་ སྦྱོང་ གི་ ཉི་ མ་ ཚེས་ བཅོ་ ལྔ་ ལ་ མགོ་ ཁྲུས་ བྱས་ ཏེ་ དབུ་ ཟུངས་ སུ་ གནས་ ཤིང་ སྟེང་ གི་ ཁྱམས་ ན་ བུད་ མེད་ ཀྱི་ ཚོགས་ ཀྱིས་ ཀུན་ ནས་ བསྐོར་ ཅིང་ འདུག་ པའི་ ཚེ་ ཤར་ ཕྱོགས་ ནས་ ལྷའི་ འཁོར་ ལོ་ རིན་ པོ་ ཆེ་ རྩིབས་ སྟོང་ ཡོད་ པ། མུ་ ཁྱུད་ དང་ ལྡན་ པ། ལྟེ་ བ་ དང་ བཅས་ པ། ཐམས་ ཅད་ གསེར་ ལས་ གྲུབ་ པ། མགར་ བས་ མ་ བྱས་ པ། འཕང་ དུ་ ཤིང་ ཏ་ ལ་ བདུན་ ཙམ་ ནས་ འབྱུང་ སྟེ། རྒྱལ་ པོ་ རྒྱལ་ རིགས་ སྤྱི་ བོ་ ནས་ དབང་ བསྐུར་ བས་ ལྷའི་ འཁོར་ ལོ་ རིན་ པོ་ ཆེ་ དེ་ མཐོང་ ནས་ འདི་ སྙམ་ དུ་ སེམས་ ཏེ། བདག་ གིས་ ཐོས་ པ་ རྒྱལ་ པོ་ རྒྱལ་ རིགས་ སྤྱི་ བོ་ ནས་ དབང་ བསྐུར་ བ་ གསོ་ སྦྱོང་ གི་ ཉི་ མ་ ཚེས་ བཅོ་ ལྔ་ ལ་ མགོ་ ཁྲུས་ བྱས་ ཏེ་ དབུ་ ཟུངས་ སུ་ གནས་ ཤིང་ སྟེང་ གི་ ཁྱམས་ ན་ བུད་ མེད་ ཀྱི་ ཚོགས་ ཀྱིས་ ཀུན་ ནས་ བསྐོར་ ཅིང་ འདུག་ པའི་ ཚེ་ ཤར་ ཕྱོགས་ ནས་ ལྷའི་ འཁོར་ ལོ་ རིན་ པོ་ ཆེ་ བྱུང་ བར་ གྱུར་ ན། དེ་ ན་ འཁྱོར་ ལོས་ བསྒྱུར་ བའི་ རྒྱལ་ པོར་ འགྱུར་ རོ་ ཞེས་ ཐོས་ ཏེ། བདག་ གི་ དྲུང་ དུ་ ལྷའི་ འཁོར་ ལོ་ རིན་ པོ་ ཆེ་ འོངས་ པ་ ལས། བདག་ ཀྱང་ འཁོར་ ལོས་ སྒྱུར་ བའི་ རྒྱལ་ པོ་ ཡིན་ དུ་ ངེས་ སོ་ སྙམ་ སྟེ། དེ་ ནས་ རྒྱལ་ པོ་ རྒྱལ་ རིགས་ སྤྱི་ བོ་ ནས་ དབང་ བསྐུར་ བ་ དེ་ བླ་ གོས་ ཕྲག་ པ་ གཅིག་ ཏུ་ གཟར་ ནས་ པུས་ མོ་ གཡས་ པའི་ ལྷ་ ང་ ས་ ལ་ བཙུགས་ ཏེ། ལག་ པ་ གཡས་ པས་ ལྷའི་ འཁོར་ ལོ་ རིན་ པ་ ཆེ་ དེ་ བསྐོར་ ཞིང་ འདི་ སྐད་ དུ། བཙུན་ པ། ལྷའི་ འཁོར་ ལོ་ རིན་ པོ་ ཆེ་ ཆོས་ ཀྱིས་ བསྐོར་ ཅིག ཆོས་ མ་ ཡིན་ པས་ ནི་ མ་ ཡིན་ ནོ་ ཞེས་ བྱ་ བའི་ ཚིག་ སྨྲས་ པ་ དང་། དེ་ ནས་ ལྷའི་ འཁོར་ ལོ་ རིན་ པོ་ ཆེ་ དེ་ རྒྱལ་ པོ་ རྒྱལ་ རིགས་ སྤྱི་ བོ་ ནས་ དབང་ བསྐྲུར་ བས་ བསྐོར་ བས་ རྫུ་ འཕྲུལ་ གྱིས་ ནམ་ མཁའ་ ལས་ ཤར་ ཕྱོགས་ སུ་ ལེགས་ པར་ འགྲོ་ སྟེ། རྒྱལ་ པོ་ འཁོར་ ལོས་ བསྒྱུར་ བའང་ དཔུང་ གི་ ཚོགས་ ཡན་ ལག་ བཞི་ པ་ དང་ ལྷན་ ཅིག་ རྗེས་ སུ་ འགྲོའོ། སའི་ ཕྱོགས་ གང་ དུ་ ལྷའི་ འཁོར་ ལོ་ རིན་ པོ་ ཆེ་ དེ་ གནས་ པར་ འགྱུར་ བ་ དེར་ རྒྱལ་ པོ་ རྒྱལ་ རིགས་ སྤྱི་ བོ་ ནས་ དབང་ བསྐུར་ བ་ དེའང་ དཔུང་ གི་ ཚོགས་ ཡན་ ལག་ བཞི་ པ་ དང་ ལྷན་ ཅིག་ ཏུ་ གནས་ པར་ འགྱུར་ རོ། དེ་ ནས་ ཤར་ ཕྱོགས་ ཀྱི་ ཁམས་ ཀྱི་ རྒྱལ་ པོ་ གང་ ཡིན་ པ་ དེ་ དག་ དངུལ་ གྱི་ སྣོད་ ནི་ གསེར་ ཕྱེས་ བཀང་ སྟེ་ ཐོགས། གསེར་ གྱི་ སྣོད་ ནི་ དངུལ་ སིལ་ མས་ བཀང་ སྟེ་ ཐོགས་ ནས་ འཁོར་ ལོས་ སྒྱུར་ བའི་ རྒྱལ་ པོ་ བསུ་ ཞིང་ འདི་ སྐད་ དུ། ལྷ་ འདིར་ ལེགས་ པར་ གཤེགས་ སོ། ལྷ་ ཚུར་ གཤེགས་ སུ་ གསོལ། ལྷའི་ ཆབ་ སྲིད་ ནི་ ཤིན་ ཏུ་ རྒྱས་ ཤིང་ འབྱོར་ ལ་ བདེ་ སྟེ། ལོ་ ལེགས་ ཤིང་ ཉམས་ དགྱེས་ ལ་ སྐྱེ་ བོ་ མང་ པོ་ དང་ མིས་ གཏམས་ པ་ ལགས་ ཏེ། ལྷ་ ཉིད་ ཀྱི་ ཡུལ་ དུ་ བྱོན་ ནས་ བཞུགས་ སུ་ གསོལ། དེ་ སྐད་ ཅེས་ སྨྲས་ པ་ དང་། རྒྱལ་ པོ་ རྒྱལ་ རིགས་ སྤྱི་ བོ་ ནས་ དབང་ བསྐུར་ བས་ རིམས་ ཀྱི་ རྒྱལ་ པོ་ དེ་ དག་ ལ་ འདི་ སྐད་ དུ། ཁྱེད་ རང་ རང་ གི་ རྒྱལ་ སྲིད་ དག་ ཆོས་ ཀྱིས་ གྱིས་ ཤིག ཆོས་ མ་ ཡིན་ པས་ ནི་ མ་ ཡིན་ ནོ། ཁྱེད་ སྲོག་ ཆགས་ མ་ གསོད་ ཅིག མ་ བྱིན་ པར་ མ་ ལེན་ ཅིག འདོད་ པ་ ལ་ ལོག་ པར་ གཡེམ་ པར་ མ་ བྱེད་ ཅིག བརྫུན་ དུ་ མ་ སྨྲ་ ཞིག ཕྲ་ མ་ མ་ ཟེར་ ཅིག ངག་ རྩུབ་ པོ་ མ་ སྨྲ་ ཞིག ཚིག་ ཀྱལ་ པ་ མ་ སྨྲ་ ཞིག བརྣབ་ སེམས་ ཅན་ དུ་ མ་ གྱུར་ ཅིག གནོད་ སེམས་ ཅད་ དུ་ མ་ གྱུར་ ཅིག ལོག་ པར་ ལྟ་ བ་ མ་ གྱུར་ ཅིག སྲོག་ གཅོད་ པ་ ལ་ བྱམས་ པར་ མ་ གྱུར་ ཅིག ལོག་ པར་ ལྟ་ བ་ ཅན་ གྱི་ བར་ ལ་ བྱམས་ པར་ མ་ གྱུར་ ཅིག ངའི་ ཡུལ་ དུ་ ཆོས་ མ་ ཡིན་ པ་ བྱུང་ ང་ རེ། ཆོས་ མ་ ཡིན་ པར་ སྤྱོད་ པ་ ལ་ བྱམས་ པར་ མ་ བྱེད་ ཅིག་ཅེས་ བསྒོས་ ནས་ རྒྱལ་ པོ་ རྒྱལ་ རིགས་ སྤྱི་ བོ་ ནས་ དབང་ བསྐུར་ བས་ དེ་ ལྟར་ ཤར་ ཕྱོགས་ སུ་ རྣམ་ པར་ རྒྱལ་ བར་ བྱེད་ དོ། ཤར་ ཕྱོགས་ སུ་ རྣམ་ པར་ རྒྱལ་ བར་ བྱས་ ནས་ ཤར་ ཕྱོགས་ ཀྱི་ རྒྱ་ མཚོ་ ལ་ འགྲོའོ། ཤར་ ཕྱོགས་ ཀྱི་ རྒྱ་ མཚོ་ ལ་ སོང་ ནས་ ཤར་ ཕྱོགས་ ཀྱི་ རྒྱ་ མཚོ་ ལས་ བརྒལ་ ལོ། བརྒལ་ ནས་ ཀྱང་ ལྷོ་ ཕྱོགས་ སུ་ ནམ་ མཁའ་ ལས་ རྫུ་ འཕྲུལ་ གྱིས་ ལེགས་ པར་ འགྲོ་ སྟེ། འཁོར་ ལོས་ བསྒྱུར་ བའི་ རྒྱལ་ པོའང་ དཔུང་ གི་ ཚོགས་ ཡན་ ལག་ བཞི་ པ་ དང་ ལྡན་ ཅིག་ ཏུ་ འགྲོའོ། སྔ་ མ་ བཞིན་ དུ་ ལྷོ་ ཕྱོགས་ སུ་ རྣམ་ པར་ རྒྱལ་ བར་ བྱེད་ དོ། ལྷོ་ ཕྱོགས་ སུ་ ཇི་ ལྟ་ བ་ དེ་ བཞིན་ དུ་ ནུབ་ ཕྱོགས་ དང་། བྱང་ ཕྱོགས་ སུ་ རྣམ་ པར་ རྒྱལ་ བར་ བྱེད་ དོ་། བྱང་ ཕྱོགས་ སུ་ རྣམ་ པར་ རྒྱལ་ བར་ བྱས་ ནས་ བྱང་ ཕྱོགས་ ཀྱི་ རྒྱ་ མཚོ་ ལ་ འགྲོའོ། བྱང་ ཕྱོགས་ ཀྱི་ རྒྱ་ མཚོ་ ལ་ སོང་ ནས་ བྱང་ ཕྱོགས་ ཀྱི་ རྒྱ་ མཚོ་ ལ་ བརྒལ་ ལོ། བརྒལ་ ནས་ ཀྱང་ ནམ་ མཁའ་ ལས་ རྫུ་ འཕྲུལ་ གྱིས་ རྒྱལ་ པའི་ ཕོ་ བྲང་ དུ་ ལེགས་ པར་ འོངས་ ནས་ བཙུན་ མོའི་ འཁོར་ གྱི་ སྒོའི་ སྟེང་ དུ་ ཉམས་ པ་ མེད་ པར་ གནས་ ཏེ། རྒྱལ་ པོ་ རྒྱལ་ རིགས་ སྤྱི་ བོ་ ནས་ དབང་ བསྐུར་ བ་ ནི་ འཁོར་ ལོ་ རིན་ པོ་ ཆེ་ རྣམ་ པ་ དེ་ ལྟ་ བུ་ དང་ ལྡན་ པ་ ཡིན་ ནོ།

འཁོར་ ལོས་ བསྒྱུར་ བའི་ རྒྱལ་ པོ་ གླང་ པོ་ རིན་ པོ་ ཆེ་ རྣམ་ པ་ ཇི་ ལྟ་ བུ་ དང་ ལྡན་ པ་ ཡིན་ ཞེ་ ན།

འདི་ ལ་ རྒྱལ་ པོ་ རྒྱལ་ རིགས་ སྤྱི་ བོ་ ནས་ དབང་ བསྐུར་ བས་ གླང་ པོ་ རིན་ པོ་ ཆེ་ སྔ་ མ་ ཞིན་ དུ་ འབྱུང་ སྟེ། ཐམས་ ཅད་ ཐལ་ གར་ གྱུར་ པ། ཡན་ ལག་ བདུན་ ཤིན་ ཏུ་ གནས་ པ། གཙུག་ གསེར་ གྱིས་ བརྒྱན་ པ། གསེར་ གྱི་ རྒྱལ་ མཚན་ དང་ ལྡན་ པ། གསེར་ གྱི་ རྒྱན་ གྱིས་ བརྒྱན་ པ། གསེར་ གྱི་ དྲ་ བས་ གཡོགས་ པ། རྫུ་ འཕྲུལ་ དང་ ལྡན་ པ། ནམ་ མཁའ་ ལས་ འགྲོ་ བ། རྣམ་ པར་ འཕྲུལ་ པའི་ ཆོས་ ཅན་ ཏེ། འདི་ ལྟར་ གླང་ པོའི་ རྒྱལ་ པོ་ བྱང་ ཆུབ་ ཅེས་ བྱའོ། གང་ གི་ ཚེ་ རྒྱལ་ པོ་ རྒྱལ་ རིགས་ སྤྱི་ བོ་ ནས་ དབང་ བསྐུར་ བ་ གླང་ པོ་ རིན་ པོ་ ཆེ་ དེ་ བརྟག་ པར་ འདོད་ པར་ གྱུར་ པའི་ ཚེ་ ཉི་ མ་ ཤར་ ཁར་ གླང་ པོ་ རིན་ པོ་ ཆེ་ དེ་ ལ་ ཞོན་ ཏེ་ ས་ ཆེན་ པོ་ འདི་ རྒྱ་ མཚོའི་ མཐའ་ སྐོར་ དང་ བཅས་ པ་ རྒྱ་ མཚོའི་ མུར་ ཐུག་ པ་ དང་ བཅས་ པ་ ཀུན་ ཏུ་ བསྐོར་ ཏེ་ རྒྱལ་ པོའི་ ཕོ་ བྲང་ དུ་ འོངས་ ནས་ ཁྱེའུ་ སུས་ ཀྱི་ དགའ་ བ་ མྱོང་ བར་ བྱེད་ དེ། འཁོར་ ལོས་ བསྒྱུར་ བའི་ རྒྱལ་ པོ་ གླང་ པོ་ རིན་ པོ་ ཆེ་ རྣམ་ པ་ དེ་ ལྟ་ བུ་ དང་ ལྡན་ པ་ ཡིན་ ནོ།

འཁོར་ ལོས་ རྒྱུར་ བའི་ རྒྱལ་ པོ་ རྟ་ རིན་ པོ་ རྣམ་ པ་ ཇི་ ལྟ་ བུ་ དང་ ལྡན་ པ་ ཡིན་ ཞེ་ ན།

འདི་ ལ་ རྒྱལ་ པོ་ རྒྱལ་ རིགས་ སྦྱི་ བོ་ ནས་ དབང་ བསྐུར་ བའི་ རྟ་ རིན་ པོ་ ཆེ་ སྔ་ མ་ བཞིན་ དུ་ འབྱུང་ སྟེ། ཐམས་ ཅད་ སྔོན་ པོ་ གྱུར་ པ། མགོ་ ནག་ པ། རྔོག་ མ་ ལྕང་ ལོར་ འདུག་ པ། ཞོན་ ན་ གུས་ པར་ བྱེད་ པ། གསེར་ གྱི་ རྒྱལ་ མཚན་ དང་ བཅས་ པ། གསེར་ གྱི་ རྒྱན་ དང་ ལྡན་ པ། གསེར་ གྱི་ དྲ་ བས་ གཡོགས་ པ་ རྫུ་ འཕྲུལ་ དང་ ལྡན་ པ། ནམ་ མཁའ་ ལས་ འགྲོ་ བ། རྣམ་ པར་ འཕྲུལ་ བའི་ ཆོས་ ཅན་ ཏེ། འདི་ ལྟར་ རྟའི་ རྒྱལ་ པོ་ སྤྲིན་ གྱི་ ཤུགས་ ཅན་ ཞེས་ བྱ་ བའོ། གང་ གི་ ཚེ་ རྒྱལ་ པོ་ རྒྱལ་ རིགས་ སྤྱི་ བོ་ ནས་ དབང་ བསྐུར་ བ་ རྟ་ རིན་ པོ་ ཆེ་ བརྟག་ པར་ འདོད་ པ་ གྱུར་ པ་ དེའི་ ཚེ་ ཉི་ མ་ ཤར་ ཁ་ རྟ་ རིན་ པོ་ ཆེ་ དེ་ ལ་ ཞོན་ ནས་ ས་ ཆེན་ པོ་ འདི་ རྒྱ་ མཚོའི་ མཐའ་ སྐོར་ དང་ བཅས་ པ། རྒྱ་ མཚོའི་ མུར་ ཐུག་ པ་ དང་ བཅས་ པ་ ཀུན་ ཏུ་ བསྐོར་ ཏེ་ ཕྱིར་ རྒྱལ་ པོའི་ ཕོ་ བྲང་ དུ་ འཁོར་ ནས་ ཁྱེའུ་ སུས་ ཀྱི་ བདེ་ བ་ མྱོང་ བར་ བྱེད་ དེ། འཁོར་ ལོས་ སྒྱུར་ བའི་ རྒྱལ་ པོ་ ནི་ རྟ་ རིན་ པོ་ ཆེ་ རྣམ་ པ་ དེ་ ལྟ་ བུ་ དང་ ལྡན་ པ་ ཡིན་ ནོ།

འཁོར་ ལོས་ སྒྱུར་ བའི་ རྒྱལ་ པོ་ ནོར་ བུ་ རིན་ པོ་ ཆེ་ རྣམ་ པ་ ཇི་ ལྟ་ བུ་ དང་ ལྡན་ པ་ ཡིན་ ཞེ་ ན།

འདི་ ལ་ རྒྱལ་ པོ་ རྒྱལ་ རིགས་ སྤྱི་ བོ་ ནས་ དབང་ བསྐུར་ བའི་ ནོར་ བུ་ རིན་ པོ་ ཆེ་ སྔ་ མ་ བཞིན་ དུ་ འབྱུང་ སྟེ། ཐམས་ ཅད་ དུ་ སྔོ་ བ། བེེ་ ཌཱུརྱའི་ རང་ བཞིན་ ཟུར་ བརྒྱད་ དུ་ འདུག་ པ། ཤིན་ ཏུ་ སྦྱངས་ པ་ འབྱུང་ སྟེ། ནོར་ བུ་ རིན་ པོ་ ཆེ་ དེའི་ འོད་ ཀྱི་ བཙུན་ མོའི་ འཁོར་ ཐམས་ ཅད་ ཀྱང་ སྣང་ བས་ ཁྱབ་ པར་ འགྱུར་ རོ། གང་ གི་ ཚེ་ རྒྱལ་ པོ་ རྒྱལ་ རིགས་ སྤྱི་ བོ་ ནས་ དབང་ བསྐུར་ བ་ ནོར་ བུ་ རིན་ པོ་ ཆེ་ བརྟག་ པར་ འདོད་ པར་ འགྱུར་ པ་ དེའི་ ཚེ་ མཚན་ མོ་ ནམ་ གྱི་ གུང་ ལ་ མུན་ པ་ མུན་ ནག་ གི་ ནང་ དུ་ ནོར་ བུ་ རིན་ པོ་ ཆེ་ དེ་ རྒྱལ་ མཚན་ གྱི་ རྩེ་ མོ་ ལ་ བཏགས་ ཏེ་ སྐྱེད་ མོས་ ཚལ་ གྱི་ ས་ བཟང་ པོ་ བལྟ་ བའི་ ཕྱིར་ སོང་ ན། ནོར་ བུ་ རིན་ པོ་ ཆེ་ དེའི་ འོད་ ཀྱིས་ ཐམས་ ཅད་ དང་ ལྡན་ པའི་ དཔུང་ གི་ ཚོགས་ ཡན་ ལག་ བཞི་ པ་ ཐམས་ ཅད་ དཔག་ ཚད་ ཁོ་ ར་ ཁོར་ ཡུག་ ཏུ་ སྣང་ བས་ གསལ་ བར་ འགྱུར་ རོ། ནོར་ བུ་ རིན་ པོ་ ཆེའི་ འཁོར་ ན་ གནས་ པའི་ མི་ དེ་ དག་ ཀྱང་ སྣང་ བ་ དེས་ གསལ་ བར་ གྱུར་ པ་ དང་། གཅིག་ གིས་ གཅིག་ མཐོང་། གཅིག་ གིས་ གཅིག་ ཤེས་ ནས་ གཅིག་ ལ་ གཅིག་ འདི་ སྐད་ སྨྲ་ སྟེ། བཞིན་ བཟང་ དག་ ལོངས། ལས་ ཀྱི་ མཐའ་ དག་ བྱོས་ ཤིག ཚོང་ འདུས་ དག་ ཁྲོམ། ཉི་ མ་ ཤར་ ཏེ་ ཉིན་ མོར་ ཤེས་ སོ་ ཞེས་ ཟེར་ ཏེ། རྒྱལ་ པོ་ རྒྱལ་ རིགས་ སྤྱི་ བོ་ ནས་ དབང་ བསྐུར་ བ་ དེ་ ནོར་ བུ་ རིན་ པོ་ ཆེ་ རྣམ་ པ་ དེ་ ལྟ་ བུ་ དང་ ལྡན་ པ་ ཡིན་ ནོ།

རྒྱལ་ པོ་ རྒྱལ་ རིགས་ སྤྱི་ བོ་ ནས་ དབང་ བསྐུར་ བ་ བུད་ མེད་ རིན་ པོ་ ཆེ་ རྣམ་ ཇི་ ལྟ་ བུ་ དང་ ལྡན་ པ་ ཡིན་ ཞེ་ ན།

འདི་ ལ་ རྒྱལ་ པོ་ རྒྱལ་ རིགས་ སྤྱི་ བོ་ ནས་ དབང་ བསྐུར་ བའི་ བུད་ མེད་ རིན་ པོ་ ཆེ་ སྔ་ མ་ བཞིན་ དུ་ འབྱུང་ སྟེ། ཚུལ་ དང་ མཐུན་ པ། རྒྱལ་ རིགས་ སུ་ སྐྱེས་ པ། ཧ་ ཅང་ ཡིད་ མི་ རིང་ བ། ཧ་ ཅང་ ཡང་ མི་ ཐུང་ བ། ཧ་ ཅང་ ཡང་ མི་ སྦོམ་ པ། ཧ་ ཅང་ ཡང་ མི་ སྐེམ་ པ། ཧ་ ཅང་ ཡང་ མི་ དཀར་ བ། ཧ་ ཅང་ ཡང་ མི་ ནག་ པ། གཟུགས་ མཛེས་ པ། ཚུལ་ དུ་ ཤིས་ པ། ལྟ་ ན་ སྡུག་ པ། ཁ་ དོག་ བཟང་ པོ་ རྒྱས་ པ་ མཆོག་ དང་ ལྡན་ པ། དེའི་ སྤུའི་ ཁུང་ ཐམས་ ཅད་ ནས་ ཙནྡན་ གྱི་ དྲི་ འབྱུང་ བ། ཁ་ ནས་ ཨུཏྤ་ ལའི་ ངད་ ལྡང་ བ། ཀ་ ཙ་ ལིནྡའི་ གོས་ ལྟར་ རེག་ ན་ བདེ་ བ། དེ་ གྲང་ བའི་ དུས་ ན་ ནི་ ལུས་ ལ་ རེག་ ན་ དྲོ་ བ། དྲོ་ བའི་ དུས་ ན། ལུས་ ལ་ རེག་ ན་ བསིལ་ བ་ སྟེ་ དེ་ འཁོར་ ལོས་ སྒྱུར་ བའི་ རྒྱལ་ པོ་ མ་ གཏོགས་ པར་ གཞན་ ལ་ ཡིད་ ཀྱིས་ ཀྱང་ འདོད་ ཆགས་ སུ་ མི་ བྱེད་ ན། ལུས་ ཀྱིས་ ལྟ་ ཅི་ སྨོས་ ཏེ། འཁོར་ ལོས་ སྒྱུར་ བའི་ རྒྱལ་ པོ་ ནི་ བུད་ མེད་ རིན་ པོ་ ཆེ་ རྣམ་ པ་ དེ་ ལྟ་ བུ་ དང་ ལྡན་ པ་ ཡིན་ ནོ།

འཁོར་ ལོས་ སྒྱུར་ བའི་ རྒྱལ་ པོ་ ཁྱིམ་ བདག་ རིན་ པོ་ ཆེ་ རྣམ་ པ་ ཇི་ ལྟ་ བུ་ དང་ ལྡན་ པ་ ཡིན་ ཞེ་ ན།

འདི་ ལ་ རྒྱལ་ པོ་ རིགས་ སྤྱི་ བོ་ ནས་ དབང་ བསྐུར་ བའི་ ཁྱིམ་ བདག་ རིན་ པོ་ ཆེ་ སྔ་ མ་ བཞིན་ དུ་ འབྱུང་ སྟེ། མཁས་ པ། གསལ་ བ། ཡིད་ གཞུངས་ པ། ལྷའི་ མིག་ དང་ ལྡན་ པ་ འབྱུང་ ངོ་། དེ་ ལྷའི་ མིག་ དེས་ དཔག་ ཚད་ ཁོ་ ར་ ཁོར་ ཡུག་ ཏུ་ བདག་ པོ་ དང་ བཅས་ པའི་ གཏེར་ དག་ ཀྱང་ མཐོང་། བདག་ པོ་ མེད་ པའི་ གཏེར་ དག་ ཀྱང་ མཐོང་ སྟེ། དེ་ བདག་ པོ་ མེད་ པའི་ གཏེར་ གང་ ཡིན་ པ་ དེ་ དག་ གིས་ འཁོར་ ལོས་ སྒྱུར་ བའི་ རྒྱལ་ པོའི་ ནོར་ གྱི་ དགོས་ པ་ བྱེད་ དེ། འཁོར་ ལོས་ སྒྱུར་ བའི་ རྒྱལ་ པོ་ ནི་ ཁྱིམ་ བདག་ རིན་ པོ་ ཆེ་ རྣམ་ པ་ དེ་ ལྟ་ བུ་ དང་ ལྡན་ པ་ ཡིན་ ནོ།

འཁོར་ ལོས་ སྒྱུར་ བའི་ རྒྱལ་ པོ་ བློན་ པོ་ རིན་ པོ་ ཆེ་ རྣམ་ པ་ ཇི་ ལྟ་ བུ་ དང་ ལྡན་ པ་ ཡིན་ ཞེ་ ན།

འདི་ ལ་ འཁོར་ ལོས་ སྒྱུར་ བའི་ རྒྱལ་ པོའི་ བློན་ པོ་ རིན་ པོ་ ཆེ་ སྔ་ མ་ བཞིན་ དུ་ འབྱུང་ སྟེ། མཁས་ ཤིང་ གསལ་ ལ་ ཡིད་ གཞུངས་ པའོ། དེ་ འཁོར་ ལོས་ བསྒྱུར་ བའི་ རྒྱལ་ པོ་ དེས་ བསམ་ པ་ ཙམ་ གྱིས་ བསྐོ་ བར་ བྱ་ བའི་ དཔུང་ རྣམས་ སྐོའོ། འཁོར་ ལོས་ བསྒྱུར་ བའི་ རྒྱལ་ པོ་ ནི་ བློན་ པོ་ རིན་ པོ་ ཆེ་ རྣམ་ པ་ དེ་ ལྟ་ བུ་ དང་ ལྡན་ པི་ ཡིན་ ཏེ། འཁོར་ ལོས་ བསྒྱུར་ བའི་ རྒྱལ་ པོ་ ནི་ རིན་ པོ་ ཆེ་ སྣ་ བདུན་ དེ་ དག་ དང་ ལྡན་ པ་ ཡིན་ ནོ།

ཞེས་ བཀའ་ སྩལ་ བ་ ཇི་ བཞིན་ ཡིད་ ཆེས་ ཁུངས་ བཙུན་ པའི་ ཕྱིར་ ཆོས་ སེང་ པས་ ཟུར་ འདོན་ བགྱིས་ པ་ དགེ་ ཞིང་ བཀྲ་ ཤིས་ པར་ གྱུར་ ཅིག

རིན་ཆེན་འཚོས་བོད་ལྗོངས་ཆ་འཕྲིན་ལྟེ་གནས་ལས་བཤུས།