རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་ཐེ་གོའི་ཙུང་ལི་ཕེ་ཐུང་ཐན་ལ་ཐུག་འཕྲད་གནང་བ།-海西州人民政府.藏文网

ཟླ11པའི་ཚེས15ཉིན་གྱི་སྔ་དྲོ།　རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་ལི་མ་རུ་ཨེ་ཤ་ཡ་དང་ཞི་བདེ་རྒྱ་མཚོ་ཆེན་མོའི་ས་ཁུལ་གྱི་དཔལ་འབྱོར་མཉམ་ལས་རྩ་འཛུགས་ཀྱི་འགོ་ཁྲིད་པའི་དངོས་གཞི་མིན་པའི་གྲོས་ཚོགས་ཀྱི་སྐབས་སུ་ཐེ་གོའི་ཙུང་ལི་ཕེ་ཐུང་ཐན་ལ་ཐུག་འཕྲད་གནང་།

ཞིན་ཧྭ་གསར་འགྱུར་ཁང་གི་གློག་འཕྲིན་ལྟར།　ཟླ11པའི་ཚེས15ཉིན་གྱི་སྔ་དྲོ།　རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་ལི་མ་རུ་ཨེ་ཤ་ཡ་དང་ཞི་བདེ་རྒྱ་མཚོ་ཆེན་མོའི་ས་ཁུལ་གྱི་དཔལ་འབྱོར་མཉམ་ལས་རྩ་འཛུགས་ཀྱི་མགོ་ཁྲིད་པའི་དངོས་གཞི་མིན་པའི་གྲོས་ཚོགས་ཀྱི་སྐབས་སུ་ཐེ་གོའི་ཙུང་ལི་ཕེ་ཐུང་ཐན་ལ་ཐུག་འཕྲད་གནང་།

ཞི་ཅིན་ཕིང་གིས་བསྟན་དོན།　ཀྲུང་གོ་དང་ཐེ་གོ་ནི་ཁྱིམ་མཚེས་མཛའ་མཐུན་རྒྱལ་ཁབ་ཡིན་ལ།　ཀྲུང་ཐེ་ཁྱིམ་ཚང་གཅིག་གི་དུས་ཡུན་རིང་བོའི་ལོ་རྒྱུས་ཀྱི་དོན་སྙིང་གལ་ཆེན་ལྡན།　2022ལོའི་ཟླ11པར་ངས་ཐེ་གོ་ལ་རྒྱལ་དོན་འཚམས་འདྲི་བྱེད་དུས།　ཐེ་གོའི་འགོ་ཁྲིད་པ་དང་མཉམ་དུ་ཀྲུང་ཐེ་ལས་སྐལ་གཅིག་མཐུན་ཚོགས་པ་འཛུགས་པའི་ཐད་ཐུན་མོང་གི་ངོས་འཛིན་གལ་ཆེན་བྱུང་ཡོད་ལ།　འཚམས་འདྲིའི་གྲུབ་འབྲས་དེ་དོན་ཐོག་ཏུ་སྨིན་ནས།　ཕྱོགས་གཉིས་ཀྱི་ཁྱབ་ཁོངས་སོ་སོ་རུ་འཕེལ་རྒྱས་གསར་བ་བྱུང་ཞིང་།　རྒྱལ་ཁབ་གཉིས་ཀྱི་མི་དམངས་ལ་དངོས་ཡོད་ཀྱི་ཕན་ཁེ་བསྐྱལ་ཡོང་ཡོད་པ་མཐོང་ནས་དགའ་སྤྲོ་སྐྱེས་ཡོད།

ཞི་ཅིན་ཕིང་གིས་བསྟན་དོན།　སང་ལོ་ནི་རྒྱལ་ཁབ་གཉིས་བར་འབྲེལ་བ་བཙུགས་ནས་ལོ་ལྔ་བཅུ་འཁོར་བའི་ལོ་རེད།　ཀྲུང་གོ་ཕྱོགས་ཀྱིས་ཐེ་གོ་ཕྱོགས་དང་མཉམ་དུ་ཀྲུང་ཐེ་སྲོལ་རྒྱུན་མཛའ་བརྩེ་དར་སྤེལ་བཏང་སྟེ།　འཕེལ་རྒྱས་འཐབ་ཇུས་སྦྲེལ་མཐུད་ལ་ཤུགས་བསྣན་ནས།　རྒྱལ་སྲིད་སྐྱོང་ལུགས་སྐོར་གྱི་ཉམས་མྱོང་བརྗེ་རེས་བྱེད་པ་དང་།　ཁྱབ་ཁོངས་སོ་སོའི་གཉིས་ཕན་མཉམ་ལས་ལ་སྐུལ་འདེད་གཏོང་བར་གཅིག་གྱུར་འཆར་འགོད་བྱེད་པ།　རང་སོ་སོའི་རྒྱལ་ཁབ་ཀྱི་དེང་རབས་ཅན་འཛུགས་སྐྲུན་ཐད་ཤུགས་འདོན་པ་བཅས་བྱས་ནས།　ཀྲུང་ཐེ་ལས་སྐལ་གཅིག་མཐུན་ཚོགས་པ་འཛུགས་སྐྲུན་བྱེད་པའི་ཐད་སྔར་ལས་གྲུབ་འབྲས་ལེན་དགོས།　ཕྱོགས་གཉིས་ཀྱིས་ཀྲུང་ཐེ་ལྕགས་ལམ་འཛུགས་སྐྲུན་ལ་ཤུགས་སྣོན་པ་དང་།　ནུས་ཁུངས་གསར་པ་དང་གཞི་གྲངས་དཔལ་འབྱོར།　མིས་བཟོས་རིག་ནུས་སོགས་གསར་དར་ཁྱབ་ཁོངས་ཀྱི་མཉམ་ལས་རྒྱ་བསྐྱེད་ནས།　རིག་གནས་དང་སློབ་གསོ།　ན་གཞོན་སོགས་ཀྱི་མི་ཆོས་ཁྱབ་ཁོངས་སུ་བརྗེ་རེས་མཉམ་ལས་བྱ་དགོས།　ཀྲུང་གོ་དང་ཐེ་གོའི་མཛའ་བརྩེ་སྔར་ལས་མི་སེམས་སུ་སིམ་པ་དང་།　མི་རབས་རེ་རེར་རྒྱུན་འཛིན་བྱ་དགོས།　ཀྲུང་གོ་ཕྱོགས་ཀྱིས་ཐེ་གོ་དང་མཉམ་དུ་འབྲི་ཆུ་དང་མེ་ཀུང་གཙང་བོའི་འབབ་རྒྱུད་ཀྱི་དངོས་གཉེར་མཉམ་ལས་དང་།　ཤར་ཕྱོགས་མནའ་བྲེལ།　གསེར་གྱོམ།　ཨེ་ཤ་ཡ་དང་ཞི་བདེ་རྒྱ་མཚོ་ཆེན་མོ་ས་ཁུལ་གྱི་དཔལ་འབྱོར་མཉམ་ལས་རྩ་འཛུགས་སོགས་ཀྱི་ཕྱོགས་མང་རྐྱེན་སྲོལ་གྱི་མཐུན་སྦྱོར་འབྲེལ་འདྲིས་ལ་ཤུགས་བསྣན་ནས།　ཤར་ཕྱོགས་མནའ་འབྲེལ་དང་ས་ཁུལ་རྒྱལ་ཁབ་ཀྱི་མཐུན་སྒྲིལ་མཉམ་ལས་ལ་སྲུང་སྐྱོབ་བྱས་ནས།　ས་ཁུལ་ཞི་བདེ་དང་བརྟན་འཇགས།　འཕེལ་རྒྱས།　དར་རྒྱས་བཅས་འབྱུང་བར་ཧུར་ཐག་གིས་བྱས་རྗེས་འཇོག་འདོད་ཡོད།

ཕེ་ཐུང་ཐན་གྱིས་བསྟན་དོན།　ཐེ་གོ་ཕྱོགས་ཀྱིས་ཀྲུང་གོ་ཕྱོགས་ཀྱི་ལེགས་འགྲུབ་བྱུང་བའི་འཕེལ་རྒྱས་ཀྱི་མཉམ་མྱོང་ལ་ཟུར་ལྟ་བྱས་ནས།　ཐེ་ཀྲུང་ལྕགས་ལམ་སོགས་རྒྱུད་གཅིག་ལམ་གཅིག་མཉམ་ལས་མཉམ་འཛུགས་བྱེད་པ་དང་།　མི་ཆོས་བརྗེ་རེས་གཏིང་ཟབ་བྱས་ནས།　སྲོལ་རྒྱུན་གྱི་མཛའ་བརྩེ་ཇེ་ཟབ་ཏུ་གཏང་འདོད་ཡོད་ལ།　ཀྲུང་གོ་ཕྱོགས་དང་མཉམ་དུ་ཨེ་ཤ་ཡ་དང་ཞི་བདེ་རྒྱ་མཚོ་ཆེན་མོའི་ས་ཁུལ་གྱི་ཕྱོགས་མང་སྒྲོམ་གཞིའི་འོག་གི་མཉམ་ལས་ལ་ཤུགས་བསྣན་ནས།　མཉམ་དུ་རང་དབང་ཉོ་ཚོང་མ་ལག་ལ་སྲུང་སྐྱོབ་བྱ་འདོད་ཡོད།　

ཚེ་ཆིས་དང་ཝང་དབྱི་ཐུག་འཕྲད་ལ་ཞུགས།　།